WILLEMSTAD – Ayera, durante inisio di e Rotary Walking Dinner, diferente patrosinador a demostrá nan sosten na un aparato nobo di mamografia pa Fundashon Prevenshon (FP).

Forsanan uní

Orco Bank, e dos klupnan di Rotary na Kòrsou, Fondo Prinsesa Wilhelmina (PWF), The Rotary Foundation i un kantidat mas di patrosinador a sera kabes pa huntu yuda Fundashon Prevenshon haña un ekipo nobo di mamografia. Despues di kasi nuebe aña e aparato aktual, un donashon e tempu aya di Lio Capriles defuntu, ta antikuá, no solamente pa su edat, pero tambe en bista di teknologianan inovativo.

3D tomosynthese

Deseo di FP ta pa por kumpra un aparato di mamografia 3D tomosynthese. Ku esei por detektá desviashonnan mas rápido, mihó i mas eksakto, motibu pa kua ademas tin ménos nesesidat pa investigashon adishonal. E teknologia 3D di e sistema nobo di mamografia (tomosynthese) ta fasilitá haña bista di posibel strukturanan sospechoso den e tehido di pechu ku den e ekipo regular di mamografia 2D ta keda for di bista. Ta bini aserka ku e aparato deseá ta mas seif i agradabel pa e pashèntnan.

Rotary Walking Dinner

Ta kalkulá ku alrededor di 450 partisipante na Rotary Walking Dinner a duna nan kontribushon di un moda kulinario. For di e plenchi Octagon na Avila Beach Hotel, kaminda nan a kuminsá e anochi ku un glas di zjampaña i algu pa habri apetit, kada ken a sali pa kompletá su ruta personal di Walking Dinner den Pietermaai. Pa esnan ku a yega final, na City Beach 88 tabatin un Pink Lady koktel pará kla, plùs un “token of appreciation” masha spesial. Ku e rekoudashon úniko aki Rotary Club Willemstad a kontribuí mas ku 40.000 florin na e proyekto menshoná.

Masha Danki

Rotary ta gradisí tur patrosinador, partisipante i restorant ku a hasi e anochi aki posibel. Si akaso abo òf bo kompania ke hasi un donashon pa kompletá e finansiamentu, semper por manda un mensahe pa rotarywalkingdinner@gmail.com pa mas informashon.

WILLEMSTAD – Sambil Curaçao ta enkantá di por anunsiá ku pronto PANDORA Jewelry lo ta situá den su sentro di kompra na Veeris. Huntu ku Aruba Airlines i Sole Eyewear, PANDORA lo ta e di tres pakus nobo ku awor aki ta den konstrukshon pa habri den Sambil.  PANDORA ta representá pa The Boolchand Group na Kòrsou i lo ta un atkisishon fabuloso mas pa e sentro di kompra.

PANDORA

PANDORA ta diseñá, fabriká i merkadeá hoya trahá na man i moderno a base di materialnan outéntiko na preisnan pagabel. Nan ta bende hoyanan di PANDORA na mas ku 65 pais i e ta enserá algu na kada ken su smak.  Sea bo ta buska algu bunita pa un namorado, algu spesial pa bo mes òf simplemente en buska di algu ku ta inspirá, bo ta sigur ku serka nan bo ta haña algu masha spesial. Keda pendiente pa e GRAN apertura mas meimei dje aña aki.

Riba potrèt drpd Luis Moreno, Archangela Garcia & Jonathan Cohen di Sambil Curaçao huntu ku señor Ravee Nandwani, Direktor di The Boolchand Group, i Pandora su Gerente di Operashon, señora Marisha Mohandas.

Jazz Meets Cultures ta nòmber di un konsepto úniko kaminda ku e músika Jazz ta topa kultura; ku esaki ta referí na nos géneronan lokal manera Tumba, Seú, Simadan, Tambú, Kizomba, Reggae, Ritmo Kombiná, Zouk i Son Montuno huntu ku e integrashon di Jazz. E evento úniko aki lo tuma lugá dia 23 di yüni próksimo na Lanthuis Brievengat.

E edishon aki di Jazz Meets Cultures ta konta ku presentashon di solamente nos artistanan lokal, kendenan lo presentá e diferente género di músika: Mc Chris Strick, Reinier Lijfrock, Ishair Monte, Sherendly “Neny” Domacasse, Ella Bernabela, Damisha Reed-Gregorio, Rashid Felida, Furgell Wijngaarden, Raynor “Ray” Lauffer, Roald Balentien, Amos Balentin, Urvin “Luwi” Jano, Merly Augusta, Niata Augusta, Æmy Niafeliz, Andrew Aalse, Djuric Virginie, Ivan Belfor, Aisha Lucas i Rendell Rosalia. Pa loke ta agrupashonnan musikal ku lo kompañá nan, esakinan lo ta Dennis Aalse & Big Band, Grupo Kompèr, Grupo Rítmiko Sablika, Grupo Trinchera i Uprising Reggae Band.

‘Early bird special’

Teniendo kuenta ku djadumingu awor ta dia di mama, a pone un ‘early bird special’ spesial pa nos mamanan; djabièrnè awor na Fusions na Saliña Galleries di 5or pa 8or pa solamente fl. 35,-! Despues di e ‘special’, karchi di entrada ta optenibel na rason di solamente fl. 55,- na 24 Uur Uit de Muur, Beep Beep i Mensing’s Caminada i tambe online via di www.ticketscaribbean.com. Karchi pa sekshon di VIP ta optenibel na 685-0650 pa fl. 175,-.

Informashon

Pa kualke informashon di Jazz Meets Cultures 2018, por chèk su página di Facebook i tambe Instagram, bou di e nòmber JazzMeetsCultures, via email na info@jazzmeetscultures.com òf tambe via di e number di telefon 540-0111.

Willemstad – MEI– Ku e pensamentu unánime, ku huntu nos tur ta logra mas, Renaissance Curaçao Resort & Casino ta selebrá metanan alkansá i ekselensia den servisio. E promé kuartal ta tras di lomba i maneho di Renaissance Curaçao Resort & Casino di akuerdo ku su atenshon máksimo pa rekurso humano a selebrá huntu ku su empleado-, supervisor- i managernan sobresaliente. Meta primordial ta, stimulá konsistensha den servisio riba e nivel máksimo i premia dedikashon, prestashon i lealtat di tur kolega.

Un pabien na Marlon Ollivierre (Casino Manager), Gina Maduro (Hotel Manager), Faysal Sint Jago (Supervisor Heart Of The House), Gilberto Minguel (Supervisor Front Of The House), Hainer Marin (Employee Heart Of The House) i Sidney Mathilda (Employee Front Of The House). Tambe, un pabien na Riangelo Jansen ku a gana e ‘Spirit To Serve Award’, esaki ta un rekonosementu masha spesial di Marriott International, ya ku e ta suprayá esfuerso di e empleado pa inspirá su koleganan, via di un aktitut positivo den kual e ta duna servisio ekselente na e huéspet promoviendo trabou den ekipo. Gerensia, Staff i Personal di Renaissance Curaçao Resort & Casino awor parti di Wind Creek Hospitality ta felisitá tur kolega sobresaliente den e promé kuartal di 2018 i ta gradisí kada un pa nan esfuerso i dedikashon di tur dia! Masha Pabien!

Property Sales Force Service Team Of The Year! Selecta pa lider di cada Continente: Renaissance Aruba ta bira ganador di CALA Regional

ORANJESTAD– MEI – Renaissance Aruba Resort & Casino a keda nombra como e ganador regional den categoria ‘Property Sales Force Service Team Of The Year’ di ELITE Awards. A scoge e ganadornan pa 2017, basa riba diferente nominacion cu a ricibi. Tur nominacion ta keda revisa dor di un comision di seleccion regional y di continente, consistiendo di lidernan mayor.

Liderazgo mayor di cada continente- America, Asia Pacifico, Europa, Medio Oriente y Africa- lo selecciona un ganador pa cada award cu lo competi pa e distincion mundial. Dentro di poco nan lo anuncia e ganadornan riba nivel mundial. Tanto, Renaissance Marina Hotel- e hotel exclusivamente pa adulto y tambe e espacioso Renaissance Ocean Suites, ta contento di a keda selecta como ganador den e prestigioso award.  “E team di benta na Renaissance Aruba ta traha duro tur dia y keda reconoce pa nos logronan den un award impresionante manera esaki, ta realmente un honor,” asina Janien Huistra, director di Benta y Mercadeo a reacciona riba e bon noticia. “E ta muestra di nos dedicacion y compromiso na e hotel y e marca di Marriott.”

“Yena bo bida i di otronan ku koló”

WILLEMSTAD —  Despues di e eksito rotundo di añanan anterior i bou di e slogan “Yena bo bida i di otronan ku koló”, EY Dutch Caribbean i JCI Dutch Caribbean lo organisá riba dia 10 di yüni e di sinku edishon di Curaçao Color Walk. E ‘fun walk’ aki lo kuminsá i kaba na Parasasa Beach i lo kubri 6 kilometer dor di kayanan di  Piskadera i bisindario. E aspekto úniko di e festin di koló spòrtif aki ta ku partisipantenan lo ser kubrí ku puiru di diferente koló na diferente punto durante e ruta. En espeshal na final e evenemento lo kulminá den un fiesta di kolo ku e ‘Big Color Splash’.

E kaminata di koló aki no ta nobo pa Kòrsou. EY pa medio di su fundashon EY Cares Foundation ta duna kontenido na EY su programa di responsabilidat sosial “Building a better working world”, i ta traha pa duna un aporte positivo i duradero na desaroyo di nos komunidat. Den e kuadro ei EY tambe ta traha huntu ku Curaçao Cares. JCI Dutch Caribbean ta forma parti di Junior Chamber International (JCI), un organisashon mundial i konosé mas ku 200 miembro entre 18 i 40 aña repartí riba e islanan di Kòrsou, Aruba, Boneiru i St. Maarten ku ta traha pa krea impakto positivo den nan mes komunidat. Basá riba e vishon mutuo i e dedikashon pa ehersé e responsabilidat sosial ku EY Dutch Caribbean i JCI Dutch Caribbean ta kompartí, e dos organisashonnan aki ta kontinua nan koperashon pa organisá e di sinku edishon di ‘fun walk’ di koló na Kòrsou.

Fun walk

E kaminata ta kuminsa i kaba ku un warm-up i cool down di Jamila Lemans i Hayrich Juliana. Lokual ta hasi e kaminata aki diferente for di kaminatanan tradishonal ta ku lo tin diferente stashon riba e ruta kaminda lo spùit e partisipantenan ku un puiru di koló ora nan pasa. Kada stashon di koló a ser realisá ku sosten di algun sponsor prinsipal, esta Maduro & Curiel’s Bank N.V., Kenfood Trading Co. (KFC), Subway, Kooyman y Popular Agencies ku su produkto Maybeline. E ‘Big Splash’ na final ta wordu spesialmente patrosiná door di Curoil. Mirando ku esaki ta e delaster aña ku e kaminata aki ta tuma lugá den e forma aki, EY i JCI lo tin un  sorpresa pa e partisipantenan.

E puiru di koló ku ta wòrdu usá durante di e kaminata no ta dañino pa salú ni pa medio ambiente, e ta seif i por laba kita fasil. 

Meta

Henter Kòrsou ta invitá un biaha mas pa bin kana, kore, baila i gosa ku otro riba e ruta pa selebrá un estilo di bida salú i pa alabes duna un otro su bida tambe koló. Kada persona ku partisipá tambe ta kontribui direktamente pa hasi bida di esnan ku mester di sosten den nos komunidat mas kolorido. E meta di Curaçao Color Walk ta pa rekoudá fondo pa otorgá na JCI Dutch Caribbean, EY Cares Foundation i e siguiente organisashonnan: Blenchi school i tambe e organisashon 1 Focus Diferente. E organisashon aki ta hasiendo di un manera positivo  varios proyekto manera ‘Inpirational week’ y ‘Transformers’ ku ta enfatisá riba inspirá mas tantu hoben posibel dor di huza material (“short films” of dokumentario) ku ta ilustrá situashonnan (difísil) diario y kon por atendé ku esakinan di un manera positivo.

Inskripshon

Personanan di tur edat por partisipá; mucha (for di 4 aña), hende yòn i hende grandi, famia i grupo di amigu i kolega tur ta bon biní. Benta di T-shirt lo tuma lugá di e siguiente manera tanten ku tin (“OP = OP”):

E gastu pa partisipá ta 20 florin pa tur hende (mucha for di 4 aña i hende grandi). Tur partisipante lo haña un T-shirt p’asina e kolónan resaltá. Durante e kaminata lo parti awa i na final fruta, i lo por sigui fiesta ku ambiente musikal na enkargo di DJ Lu-C i MC Hype.

Pa grupo grandi (15 persona of mas) tin e oportunidat di hasi registrashon pa grupo. Pa mas informashon tokante esaki mail curacaocolorwalk@gmail.com i pa mas detayenan esklusivo bishitá e Facebook di Curaçao Color Walk.

Ku masha orguyo i ku un plaser inmenso nos por anunsiá e último artistanan ku lo bai hasi e  alineashon kompletu di Curacao North Sea Jazz Festival di e aña akí. Djabièrnè 31 di ougustus nos lo yama un bes mas bon biní na e fenómeno musikal Sting riba nos isla., ku lo keda akompañá riba tarima pa niun hende otro ku no ta Shaggy. Nan dos ta forma huntu e klousura fenomenal i fabuloso riba e tarima ku ta hiba nòmber di Sam Cooke. Anto e dia despues riba djasabra niun hende ménos ku e artista Christina Aguilera lo presentá riba tarima Sam Cooke. Ademas di esei ta un plaser pa notifiká ku tambe lo presentá riba e mesun djasabra ei otro artista di taya ku yama CeeLo Green ku lo duna su presentashon riba e tarima Sir Duke. 

Sting  ya pa hopi dékada ta un di e nòmbernan musikal di mas grandi mei mei di género di músika, pa e simpel echo ku el a risibí no ménos ku 16 galardon Grammy Awards i di por a bende en total kasi 100 mion di álbum huntu ku The Police i komo guitarista solista. E artista hamaikino Shaggy a hasi un hasaña riba su mes pa fortalesé popularidat di e ritmo di reggae i di dancehall, ku éksitonan manera Oh Carolina, Mr. Boombastic, It Wasn’t Me i e piesa Angel. Aunke ku na promé bista kisas lo bo haña impreshon ku e kombinashon di e dos personanan akí ta parse di ta un kombinashon no realístiko, de fakto i en realidat e kombinashon di e dos personanan akí a resultá di ta musikalmente un kombinashon musikal perfekto. E plan original ku Sting lo a kontribuí den un di e númeronan di Shaggy a resultá den e piesa Don’t Make Me Wait, ku a bira tambe e promé disko sengel kaminda  nan dos a toka huntu. E kombinashon akí a kai den asina bon tera, ku Sting i Shaggy a kontinuá ku e racha triunfante akí. E resultado tabata: nan álbum nobo tokando nan dos huntu ku ta hiba komo título 44/876 ku un sentimentu realmente isleño. E verano akí Shaggy i Sting huntu ta bai hasi un gira dor di kontinente  europeo pa diferente lokashon históriko.

Christina Aguilera ta un kantante kompositor ganadó di Grammy Award , ku ta konosí pa su bos fuerte i pa su éksitonan. Durante su karera e la bende mas ku 43 mion disko mundialmente. Aguilera tin 5 éksito number 1 riba Billboard Hot 100, i ta entre e tres damanan ku den tres desienia konsekutivo ta logra penetrá drenta puesto haltu(añanan ‘90, ‘00 i ‘10). E la gana 6 Grammy Awards, entre kua un Latin Grammy Award. Tambe e tin su strea riba Hollywood Walk of Fame i e ta tin e honor komo úniko artista bou di 30 di aparesé  riba e lista di  Rolling Stone magazine, ku e 100 kantantenan di mas grandi di tur tempu. Na 2011 Christina Aguilera a drenta mundu di televishon komo coach den e programa The Voice, e programa di NBC nominá pa Emmy Award.  Aguilera a sigui usa su bos pa e bon kousa. For di 2009 e ta internashonalmente portabos di Yum! Brands’ World Hunger Relief i a yuda rekoudá mas di 150 mion dòler pa e programa mundial di kuminda i otro instansianan pa kombatí hamber. 15 di yüni su di 6 disko Liberation lo sali, pa kua for di awor por hasi pedido.

E  kantante CeeLo Green nos konosé mihó komo artista solista, aunke tin bastante fanátiko ku gran plaser ta mira bèk na e tempu kaminda el a bira famoso komo e parti mitar di Gnarls Barkley; i e otro parti mitar ta e produktor famoso Danger Mouse. E piesa Crazy a logra pone e duo di soul akí riba mapa musikal na aña 2005; e éksito monstruoso akí ku a keda koroná ku un Grammy i entre tanto tin su propio página Wiki ku ta mas largu ku un di kualke artista! Aunke ku ofisialmente Gnarls Barkley nunka a keda eliminá i desolvé, su di dos i último álbum tin e fecha di for di dies aña pasá. Ku su zonido di bos i timbre  altu ku ta algu úniko CeeLo Green a demostrá for di e fecha ei ku e por para riba su mes pianan, loke ta duna testimonio den su disko sengel ku a resultá den un éksito musikal rotundo titulá Fuck You! (2010), i ku esaki el a alkansá puesto number un riba e lista di e mihó kuarentanan di Hulanda.

150 persona lo partisipá

WILLEMSTAD- Mei 2018 – Ofisina di Turismo di Kòrsou (CTB) ta ofresiendo hotèlnan miembro di CHATA e oportunidat di sigui un programa di entrenamentu ku enfoke riba servisio na kliente. E entrenamentu diseñá dor di Teamwork Curaçao spesialmente pa nos merkado, a keda ofresé dor di CTB pa empleadonan ku tin kontakto direkto ku e turista. Total 150 persona lo pasa den e kurso aki repartí den 3 grupo. E promé grupo di 46 persona a terminá dia 8 di mei miéntras e di dos grupo lo inisiá dia 14 di mei awor.

E programa ta konsistí di e siguiente modulonan: Eksperensia di e Kliente, Komunikashon ku e Kliente, Sorpresá bo Kliente, E Kliente Difísil i finalmente E Kliente Diferente. E hotèlnan ku ta forma parti di e promé grupo ta: Avila Beach Hotel, Baoase Luxury Resort, Blue Bay Curaçao Golf & Beach Resort, Bon Bini Seaside Resort, Holiday Beach Resort and Casino, Kontiki Beach Resort, Papagayo Beach Hotel, Papagayo Beach Resort, Pietermaai Boutique Hotel i Royal Sea Aquarium Resort.

WILLEMSTAD- May, 2018 – Curaçao Tourist Board (CTB), Curaçao Airport Partners (CAP), Curaçao Airport Holding (CAH) and Curaçao Hospitality and Tourism Association (CHATA) are pleased to announce a 3^rd non-stop service of Air Canada to Curaçao during the winter season 2018 – 2019.

Air Canada will add a 3^rd weekly flight from Toronto to Curaçao starting December 2018. Currently Air Canada operates from Toronto to Curaçao; 1 year-round flight and 1 weekly flight during the winter season. Air Canada also operates 1 weekly flight from Montreal during the winter season. During the winter season 2018 – 2019, Curaçao will have a total of 3 weekly flights from Toronto and 1 weekly flight from Montreal with Air Canada. All flights will be operated with an Airbus 320, which is also an upgauge of equipment. Additionally Air Canada also announced a change from their Air Canada Rouge product category to Air Canada. Air Canada offers a premium product versus Air Canada Rouge which is their low-cost airline.

Air Canada started flying to Curaçao in 2011. This winter season looks promising with a weekly capacity of 566 seats from Canada to Curaçao. The total weekly seat capacity also includes 1 flight from Montreal. Canada is one of our growing markets. We look forward to welcoming more visitors from Canada.

ORANJESTAD– MEI – Recientemente Renaissance Aruba Resort & Casino a celebra nan Team Of The Year 2017 (TOY 2017). Esaki a sosode durante di un anochi hopi special na Renaissance Festival Plaza cu a wordo combina cu entretenimento, un buffet y un ‘fun photobooth’.   Sr. Paul Gielen, General Manager, a habri e anochi gradiciendo tur colega pa nan presencia y dedicacion durante di henter 2017 y naturalmente a dirigi algun palabra di motivacion pa e aña presente, “Nos tin hopi gratitud; semper ta masha dificil pa premia e miho, di e mihonan na Renaissance Aruba pa motibo cu nos tin un tremendo staff! Nos ‘best of the best’ a keda selecta basa riba nan prestacion di trabou excepcional. Un biaha mas nos ta gradici boso tur, pa e lealtad na nos resort y tur esfuerso extra cu ta wordo haci diariamente pa nos huespednan. Boso ta e cara di Renaissance, hunto nos ta hiba nos resort na e nivel di mas halto.”

Renaissance Aruba Resort & Casino, awor parti di Wind Creek Hospitality ta felicita tur empleado cu a sobresali den 2017. A reconoce den Heart Of The House, Veronica Wilson, Beverage y tambe Marshilyne Kock den Reservations. Den Front Of The House a reconoce Ismaël Hidalgo di Crystal Table Operations, tambe Berlinda Engelhardt di Front Office y Samuel Kelly na Starbucks Marketplace. E supervisornan sobresaliente a resulta, Mariano Dania den Security, Javier Mendoza den Stewarding y tambe Xamira Geerman di Starbucks Marketplace. E managernan cu a keda honra ta, Robin Croes di Sales & Marketing, Eric Simmons di Accounting y tambe Virginia Hernandez di Starbucks Marketplace. Maneho di Renaissance Aruba Resort & Casino y Wind Creek Hospitality ta felicita tur empleado cu a sobresali. Riba fotonan adhunto parti di e celebracion na Renaissance Festival Plaza y tambe Team Of The Year 2017. Masha Pabien!

Un piropo modèrno

WILLEMSTAD/ DXBT, e grupo formá pa Denzel, Xechell i Bjorne tin un otro piesa! Nan ta konosí pa kanta loke mayoria hóben di nan edat ta eksperensiá, un di e vivensia nan ei, sigur ta namoramentu! E piesa ‘Mamasita’ un ‘piropo’ moderno ta kantá na 4 idioma- papiamentu, spañó, ingles i ulandes. E grupo a bin ta hasi algun stap importante pa nan kresementu den farándula, un di nan ta promoshon di e grupo na radio-emisoranan na Ulanda. Den e piesa ta figurá un otro artista di Decoded, Jaido- ku sigur no tin mester di niun introdukshon. ‘Mamasita’ ta un produkshon di Pastor i tin un flow moderno di Reaggeaton i House Music. Esaki ta e di 4 piesa ku e grupo ta saka riba merkado lokal. Hóbennan por sigui DXBT riba Snap Chat, Facebook/Instagram: DXBT / DecodedOfficial. Tambe por stream riba iTunes/ Spotify/ Google Play/ Apple Music. Suskribí grátis na SoundCloud, DecodedOfficial i sigui artistanan di Decoded via di nan YouTube Channel: Decoded.

WILLEMSTAD – Di dia 4 pa 11 di mei último, inskripshon a habri pa Festival Un Kanto pa Kòrsou 2018. Un total di 21 komposishon a keda registrá. Esaki a pone ku den e dianan ku a pasa, e komishon organisadó mester a skohe e 15 nan lo pasa pa kompetí.

Un total di 15 kansion ki vários ritmo lo kompetí e aña aki pa e titulo máksimo di Un Kanto pa Kòrsou 2018, di kual e ganador lo interpretá su kansion djaluna dia 2 di yüli na Brion Plein, kaminda e seremonianan ofisial di Dia di Bandera di Kòrsou.

Pa loke ta trata e intérpretenan e aña, esakinan lo ta e siguiente kantantenan: Ced Ride, Gerald `Payo` Torregrosa, Suellen Lady Sue, Michael Boncoeur, Ritzel Godfried, Edson Nahr, David Hugo, Emsley Janga i Shannon Martha den un duo, Aaron Ramos, Cristeline Corasol, Ismerai Francois, Irene da Silva Lobo, Naomi Silvanie i Harlianne Silvanni.

Pa loke ta trata e kompositornan, Ike Jesurun ta enkabesá esaki ku 3 komposishon, sigui pa Eldrison Eugenia ku 2 i sobra 10 nan ta repartí entre Ced Ride, Tiziani Elizabeth, Darwin Gregg, Elia Isenia, David Hugo, Shannon Martha, Aaron Ramos, Bibi Gonet, Ingerelli Francois, Irene de Silva Lobo i Eldrison Eugenia.

E areglistanan pa Un Kanto pa Kòrsou 2018 tambe ta interesante. Clark Elizabeth tin 3 areglo na su enkargo i e ta kombiná un otro ku Lindo Casper. Dennis Aalse tin dos areglo na su nòmber mes kos ta tambe pa Gregory Colina i Axcel Concencion. E otro areglistanan ta Ced Ride, Albany Castro, Jerrel Poula, Angelo Borrel Dopwell i Hershel Rosario.

Djarason awor dia 16 di mei pa 7 or di anochi lo tin un reunion ku tur e partisipantenan, nan kompositornan i tambe e areglistanan pa asina ei pasa riba tur detaye di e Festival.

Ensayonan ta kuminsá djadumingu dia 20 i a repartí e gruponan den 3 di 5 kansion kada unu.

Festival Un Kanto pa Kòrsou 2018 ta tuma lugá djadumingu dia 3 di yüni na Brakkeput Mei Mei. 15 kantante lo bai kanta Grandesa di Kòrsou den tur sentido di palabra. Karchi ta optenibel na rason di 25 florin adelantá i 35 florin na porta. Pueblo no por pèrdè e tremendo Festival di Kanto pa Kòrsou aki.

WILLEMSTAD – Mirando e situashon ku Nos pais Korsou ta pasando aden ultimo tempu e produktor Widney Martha a lansa un produkshon musikal yamá ‘Ban hasi Orashon’. Varios artista konosí na Kòrsou a kanta riba e produkshon aki. Entre otro; Orlando “Piwi” Smith, Charlotte Van Blarcum, Laura Martha, Farley Lourens, Merietza Haakmaat, Ana Iria Nivellac, Richard Engelhardt i Widney Martha mes komo músiko i areglista.

“Meta di e kansion ta pa hasi nos pueblo bira mas konsiente ku nos mester lanta i biba nos fe. Nos no por keda ku mesun mentalidat si nos ke bai dilanti. Kisas hopi di nos a bira nos lomba pa Dios keriendo ku nos mes por. Pero tin hopi korientenan spiritual ku ta pasa dor di otro ku nos no por bringa ku nos armanan natural. Nos mester bai na rudia i hasi orashon pa nos por kombatí of frena e forsanan ku ta stroba nos di bai dilanti,” Widney a bisa.

“Alabes nos mester pone nos diferensianan un banda i stòp di wak solamente pa nos mes p’asina nos por yuda otro. Uní nos por logra, “ e produktor a sigui bisa.

“Mi ta spera ku e kansion aki por bendishoná i aktivá e pueblo di Kòrsou i pa nos por mara huntu pa progesá i bai dilanti. Alabes nos di “Life Changers Foundation” kier a invitá komunidat kompletu pa dia 7 di yüni nos por bini huntu na Wilhelminaplein (Alameda) pa asina nos por resa i kanta huntu pa Kòrsou. E anochi aki tin diferente mandatario ku lo hiba palabra i diferente pastor di diferente dominashon ku tambe lo duna un palabra i hasi orashon pa Kòrsou. Laga nos para huntu pa nos ekonomia, situashon sosial, enseñansa i bienestar general por drecha.”

“Riba e anochi di 7 di yüni artistanan tambe lo uni pa interpretá e kansion; Ban Hasi Orashon. Alabes lo honra Sr. Julius koko tambe pa e trabou ku el a hasi último tempu.”

Willemstad Mei 2018 – E kompanianan Curoil, Aqualectra i Refineria di Kòrsou a entamá un huiso sumario pa haña klaridat den ki kuadro Refineria Isla, enfrentá ku beslagnan di ConocoPhilips, mester keda kumpli ku su obligashon konforme e kontrato di suministro, sigur riba plaso mediano i largu. Gobièrnu, huntu ku e kompanianan, a garantisá ku komunidat ta dispone di e.o. gasoline, gas, gasoil etc pero tambe ku tin kombustibel pa generá koriente i produsí awa, riba termino korto i mediano. Netamente pa haña klaridat, mas trempan posibel, riba e deber di Refineria Isla pa keda komplí ku e kontrakt di suministro ku nan tin, Curoil, Aqualectra i Refineria di Kòrsou a entamá un huisio sumario.

Unabes tin un veredikto di korte e kompanianan sa e ora ei, den un fase adelanta, ki paso mester tuma pa garantisá nos komunidat ta keda abastesé ku e produktonan tan importante aki pa nos biba di tur dia.

Danki na sostén di sektor privá hopi kos por keda realisá!

Djaluna mèrdia, ku sostén di MILES Trucking, e tim di Curaçao zoo a logra un di nan metanan ku tin basta tempu ta warda… ‘container’ pa su kushina industrial! Un kushina industrial ta un parti elemental pa kualke zoológiko modèrno; mester di área pa almasená kuminda friu, seku, yerba etc. Un ‘reefer container’ ta algu ku hopi zoológiko internashonal ta uza pa almasená kuminda di bestia i asta hasi esaki un tipo di frízer.

Pa move un ‘container’ asina no ta fasil pero danki na e donashon di MILES Trucking, Curaçao Zoo por kuminsá traha riba nan ‘container reefer’ ku na luna di sèptèmber próksimo lo mester ta kla pa pone den uso na nan área di kushina nobo na Reigerweg. Unabes ku e kompania Dommelse Watermolen muda for di e edifisio di Curaçao Zoo na Reigerweg, e área aki lo bira magazina di kuminda por kompleto; algu ku pa hopi aña mester a traha di manera amatùr lo kuminsá kue forma den e próksimo lunanan.

Curaçao Zoo ta yama danki na kada donante ku mensualmente ta aportá ku e mínimo di fl.5,- ku a yuda nan yega na e promé paso aki. Falta hopi mas pero ku kada granito ku nos siudadanonan aportá, ta mira e lus na horizonte bria mas pa Curaçao Zoo.

ORANJESTAD, Aruba – Mei 2018: E aña aki Aruba tin 4 hoben cu lo participa den e “Football for Friendship”, cual ta un Children’s Social Program na Moscow, Rusia. Esaki lo tuma luga den luna di Juni y un biaha mas Aruba Bank ta mustra nan sosten.

E hoben Sheqayli Ascencion lo ta un di e hobennan participante y hunto cun’e lo ta biahando un mayor. Aruba Bank a aporta un biaha mas unda e biaha aki a coopera cu un contribucion pa un mayor por compaña Sheqayli Ascencion na Rusia.

E programa aki no ta solamente pa e hobennan desaroya nan mes den futbol, pero tambe pa promove pa biba mas saludabel y pa e hobennan di diferente paisnan por ta mas “open” pa entre cambia ideanan nobo. Un otro parti hopi special ta pa pasa e mensahe di Amistad, Igualdad, un miho bida saludabel, y un miho medio ambiente.

Aruba Bank ta desea cada hoben exito na Moscow, Rusia.

ORANJESTAD, Aruba – Mei 2018: Despues di 19 aña, Balashi ta introduci un imagen nobo pa tur su cahanan, blekinan y su boternan di cerbes cu por debolbe despues di uzo. E evento pa lansamento di e imagen nobo aki tabata pa honra nos patrimonio nacional. A tene na un cas bieu di Aruba situa na Koyari. A comberti e cas den un experiencia unico cu ta inclui proyeccionnan riba e cas mes, mientras cu paden e invitadonan a haya e oportunidad pa participa den un tour futuristico virtual den e brouwerij.

E prome tour di experencia virtual crea na Aruba ta enfoca riba algun hecho interesante, manera entre otro cu Brouwerij Nacional Balashi N.V. ta un brouwerij total produciendo e producto completo, un di esunnan mas moderno den henter Caribe. E ta sigura un produccion na standardnan halto di calidad y sostenibilidad pa ofrece un cerbes di bon calidad.

Cerbes Balashi ta prepara uzando metodonan tradicional for di Alemania, pero cu un toke local, uzando e awa di bon calidad cu nos ta produci na Aruba, cu “premium” y “hops” procedente di Europa, pa garantisa un bon cerbes prepara na Aruba mes cu hopi pasion. Pa e banda di e cerbes mes, e tour ta conta di e proceso y controlnan pisa cu ta tuma luga pa garantisa calidad superior di e cerbes. E “Virtual Reality Brewery Tour” ta un experiencia increibel prepara pa Brouwerij Nacional Balashi cu partnernan local y cu a bira un di e “highlight” nan di e anochi. Publico general tin oportunidad pa experencia e tour aki na e Craft Beer Festival na Hilton Resort diasabra dia 19 di mei proximo.

E imagen nobo di Balashi ta uni tecnologia moderno y e fundeshi di e marca, cu ta e patrimonio nacional di Aruba. Musica durante e anochi di lansamento tabata den man di Datapanik, compaña pa Vicente Ras.

Henter e pakete nobo ta duna un imagen diferente, aunke cu Balashi ta reconocibel facilmente, como e icono cu e logo cu e mata di Fofoti, hungando un rol primordial riba e caha. E imagen nobo lo drenta supermercadonan y barnan desde e siman aki.

Esaki no tabata un trabou facil, pero Brouwerij Nacional Balashi ta spera cu e cambio di imagen aki pa cerbes Balashi, lo haci nos tur mas orguyoso ainda di nos cerbes di Aruba.

Riba dia Internashonal di Telekomunikashon

WILLEMSTAD: Awe, riba dia Internashonal di Telekomunikashon, ku e aña aki tin komo tema ‘Fasilitá uso positivo di Inteligensia Internashonal’, Digicel ta afirmá su kompromiso pa usa teknologia futurístiko ku ta benefisiá un i tur. Segun Digicel, mundu ta kanando un proseso di digitalisashon ku lo resultá den un futuro ku Inteligensia Artifisial den kas- i siudatnan.

Inteligensia Artifisial ta un ramo di Informátika ku ta abilitá mashin pa hasi trabounan ku normalmente ta rekerí un hende. Ehèmpelnan ta Appnan di telefòn ku ta rekonosé bo stèm, òf ku kua bo por tradusí teksto. Riba tereno di telekomunikashon tur dia tin deskubrimentunan nobo ku ta usa Inteligensia Artifisial. “E posibilidatnan ta infinito”, Kevin Kelly, CEO di Digicel Kòrsou ta bisa. “Uso di Inteligensia Artifisial ta aselerando rápidamente. E kombinashon di mashin i hende trahando huntu ya kaba ta mustrando kambionan positivo riba e manera ku nos ta komuniká ku nos klientenan.”

Antisipando riba e kambionan, Digicel konstantemente ta invertí den retnan inovativo di data ku ta klá pa futuro. Na Digicel Megastore por ehèmpel empresarionan por hasi uso di e YEALINK-telefon (foto) ora no tin niun hende na bali, pa tòg wòrdu yudá mesora sin intervenshon di un representante di Digicel. Usuarionan di call center tambe por a ripará ku últimamente i ku mas regularidat un mashin ta kontestá preguntanan di kliente. Di e manera ei Inteligensia Artifisial AI ta yuda klientenan di Digicel pa ta mas den kòntròl.

Kevin Kelly ta konkluí, “Nos ta trahando duru pa niun hende no keda atras den e desaroyo aki. Nos ta para firme pa un medioambiente inspirá riba digitalisashon ku ta inkluí tur hende i ku ta benefisiá nos tur.” Dia Internashonal di Telekomunikashon ta wòrdu selebrá tur aña dor di e Asosiashon Internashonal di Telekomunikashon riba 17 di Mei. Komo miembro di e mundu global di telekomunikashon, Digicel ta konmemorá e dia huntu ku mas ku 700 organisashon rònt mundu.

Plaza Ambiente a bira un realidad

ORANJESTAD, Aruba – 16 di Mei 2018: Aruba Hotel and Tourism Association (AHATA) hunto cu Divi Resorts a celebra e apertura oficial di Plaza Ambiente na Huize Maristella. Awo si nos hendenan grandi por disfruta di un dushi Plaza cu dushi brisa y sombra y haci diferente actividad.

E proyecto aki a cuminsa 1 aña pasa ora cu AHATA tabata na Huize Maristella como boluntario pa asina verf algun camber. Vanessa Rasmussen, administrator di AHATA, a indica cu nan a conoce Marita Tjou-Tam-Sin y a scucha di e soño cu nan tabatin. AHATA a pensa cu lo tabata bunita si por a haci un di e soñonan bira realidad. Y asina AHATA a cuminsa traha ariba e proyecto di Plaza Ambiente cu tabata inclui nivela e tereno, a instala 182m2 di yerba artificial. E hendenan grandi e tempo ey no tabata por a cana y disfruta di e plaza pa motibo cu esaki tabatin tera. AHATA a mira cu no tabata tin stoel drechi ni sombra.

P’esey AHATA a acerca nan miembro Divi Resort y a mustra nan e proyecto. Divi Resort a gusta e proyecto aki, pasobra nan a mira cu esaki tabata algo bon p’e hendenan grandi. Divi Resort a yuda cu e instalacion di 3 palapa y mueblenan di pafo, unda cu AHATA a tuma contacto cu Art & Design, cual compania tambe a duna nan granito di arena trahando conhuntamente cu AHATA e borchi di Plaza Ambiente y pa despues instala esaki.

Marita Tjou- Tam- Sin, Locatie Manager di Huize Maristella, a indica cu 2 aña pasa e tabata zorg manager di un departamento di Maristella y el a mira cu na e luga patras nan no ta haci nada cun’e. El a bay Bon Bin Cargo y a haya un container, unda a traha un luga pa bende snack y asina aki hendenan grandi por busca nan coy come. Marita Tjou- Tam- Sin a ricibi donacion di diferente caminda y durante Aruba Doet, el a mustra AHATA di su proyecto. El a expresa su miedo cu hendenan grandi por cay y dal curpa, pero AHATA a dicidi di yuda pone e yerba artificial y Divi Resort a yuda pone e palapa.

Divi Resort a ricibi for di AHATA un request pa contribui cu nan proyecto, asina Lydianne Croes, manager di proyecto di Divi Resort, a expresa. E hotel a contribui cu material na e proyecto aki. Tur hende a disfruta di e ambiente y Divi Resort ta spera cu e clientenan Huize Maristella por sigui disfruta di Plaza Ambiente.

Coro La Escala tabata presente na e apertura di Plaza Ambiente na Huize Maristella, unda cu nan a toca diferente musica p’e hendenan grandi. E aña aki e coro a cumpli 30 aña di existencia, mientras cu pa 25 aña nan ta contribuyendo cu organisacionnan manera Huize Maristella, asina Hector Perez, director di coro La Escala, a expresa. Un biaha mas e coro a colabora cu Huize Maristella pasobra semper nan ta cla pa yuda mantene e hendenan grandi contento.

AHATA ta gradici Divi Resorts y team pa nan entusiasmo y contribucion cu e proyecto. Tambe ta gradici Marita Tjou-Tam-Sin, kende a traha hunto cu AHATA den e proyecto aki, Arts & Design y Octavio Hoyos. Danki na Coro La Escala pa trece ambiente y pa colabora durante e apertura oficial. AHATA ta contento di mira e smile cu e hendenan grandi tin pasobra nan por disfruta di e Plaza Ambiente na Maristella durante oranan di mainta, atardi y anochi.

WILLEMSTAD- Minister di Desaroyo Ekonómiko Steven Martina, na nòmber di Gobièrnu di Kòrsou, ta organisá un Diálogo Demokrátiko pa por haña un mihó bista kiko ta pueblo su vishon pa ku futuro di Sha Caprileskade. Pa Gobièrnu por tuma un mihó desishon a largo plaso riba futuro di Sha Capriles, ta nesesario pa skucha punto di bista di hendenan for di tur gremio di nos komunidat durante e Diálogo Demokrátiko aki. Di e forma aki pues, Minister Martina ta ekstendé un invitashon na Pueblo di Kòrsou pa esnan interesá na partisipá registrá pa por forma parti aktivo na e Diálogo Demokrátiko aki.

E Diálogo Demokrátiko lo tuma lugá djaweps dia 31 di mei próksimo den nos sentro di siudat riba Plasa Jojo Correa di 6or pa 9or di anochi.

Ministerio di Desaroyo Ekonómiko (MEO) ya a kuminsá ekstendé un invitashon personal na personanan di interes ku nos ta kere ta importante pa partisipá aktivamente durante e diálogo. Sinembargo nos ke duna pueblo tambe un bos den e desishon ku lo mester keda tumá, mirando ku esaki alfinal ta toka nos kada un di un òf otro forma.

Pa esnan ku ta deseá di partisipá aktivamente na e diálogo aki, ta di vital importansia pa registrá previamente. E registrashon no solamente ta nesesario pa e ministerio por haña un mihó bista ken ta esnan ku lo kier partisipá pero tambe e ta nesesario mirando ku lugánan pa partisipantenan ta limitá.

Pa pueblo por registrá, Ministerio di Desaroyo Ekonómiko a pone un lenk riba nan página di Facebook kaminda esnan interesá fásilmente lo por inskribí.

Inskripshon lo ta habrí te ku djaluna 21 di mei próksimo pa 6or di atardi.

Un siman promé ku e diálogo, MEO i United Nations Development Plan (UNDP) lo organisá un anochi di informashon obligatorio pa tur partisipante.

Sin registrashon i partisipashon na e anochi di informashon aki, lo no ta posibel tuma parti aktivamente na e Diálogo Demokrátiko.
Durante e anochi di informashon promé ku e diálogo entre otro lo kompartí informashonnan importante pa e proseso di e diálogo kana mas efektivo posibel i tambe ta e oportunidat perfekto pa partisipantenan por hasi preguntanan tokante e diálogo i haña un mihó komprondementu kiko ta wòrdu sperá di nan.

E proseso di un Diálogo Demokrátiko a wòrdu skohé mirando ku esaki ta un instrumento partisipativo i inklusivo ku pa años ta wòrdu uzá pa Nashonnan Uni pa konhuntamente yega na puntonan di prioridat riba tópikonan spesífiko entre gruponan ku pensamentu òf interesnan diferente. E instrumento aki ta hasi posibel pa yega na desishonnan mas inklusivo mirando ku bo ta involukrá tur partido di interes i duna nan un bos den e tomo di desishon.

E proseso di diálogo lo tuma lugá repartí den diferente gruponan di 6 pa 8 persona bou di guia di un fasilitadó i un ko-fasilitadó. Konhuntamente kada mesa lo interkambiá riba puntonan spesífiko ku tin di aber ku e tópiko aki i trese nan opinion, preokupashonnan i sugerensianan dilanti.

Na final di e diálogo lo skohe pa medio di votashon kua ta e desishon(nan) final i esaki ta bira e resultado di e Diálogo Demokrátiko.

E intenshon ta, pa e Diálogo Demokrátiko aki kondusí na un òf mas akshon ku por duna nos Gobièrnu un direkshon. E desishon di e diálogo lo ta un liña pa Gobièrnu di Kòrsou por kana yega na un desishon konkreto i struktural pa término largu pa loke ta trata e futuro di Sha Caprileskade.